كتب – محرر الاقباط متحدون 
كشف المفكر والطبيب خالد منتصر، اقتحام شاب كردي مسرح أوبرا من اجل ايقاف الموسيقى و ليدعو ملكة هولندا لاعتناق الاسلام، في انتهاك واضح لحياة الآخرين ولحرية الدين والمعتقد .
 
وكتب منتصر عبر صفحته الرسمية على فيسبوك :”  #غزوة_الأوبرا #الحشرية_أسلوب_حياة، الفيديو ده منشور في صفحات كتير على ان صاحبه هو قائد الأوركسترا، الحقيقة هو شاب مسلم كردي طلع بسماجة وغلاسه وبالعافية في ٢٠١٣ للجهاد على مسرح الأوبرا وقرر يحشر نفسه في عقيدة ملكة هولندا ويدعوها للاسلام !!!هي كده ،طلعت في دماغ الأخ انه لازم يوقف الموسيقى وياخد ثواب!!!.
 
دي مشكلتنا احنا المسلمين خاصة في دول الغرب ،عايزين نحشر ديننا في أي حاجة ،وبنخلط أبو قرش على أبو قرشين زي مابيقولوا عندما ف الفولكلور ،ومش عارفين ايه يتقال امتى وفين!! حفلة موسيقية والناس مستمتعة تقوم انت طالع زي عفريت العلبة وبدون مقدمات تكلمهم عن ضرورة الدخول في الاسلام وازاي تبقى حضرتك من الفرقة الناجية وحضرة الملكة ماتبقاش من الحلوى المكشوفة وتتحجب!!.
زي ماكانوا بيعملوا معانا ف الكلية أيام الجماعة الاسلامية ، ييجوا في نص المحاضرة ويقروا قران أو يقف واحد من الطلبه يؤذن والاستاذ يسكت !!زي ماتبقى قاعد ف الميكروباص واللي جنبك يقول لك بدل ماتسمع أغاني ف الموبايل يا أخي اسمع السديسي !! لاحظ انك لاتعرفه ولا شفته قبل كده !!.
 
زي بالضبط الأخ أبو تريكة لما يطلع يحلل ماتش ويتكلم عن المنتخب رافع راية الاسلام الذي لايمكن  أن يهزم ، وان مباراة المغرب وحدت المسلمين ،ويطلع زميله يقول استعادة الأندلس..الخ .
 
يعني حضرتك قاعد في هولندا لاجئ ، نايم واكل شارب واخد معونة لجوء وبطالة ، وعشان توصل هناك شفت الموت بعينيك سواء بحراً أو براً ، وبعد كده حضرتك جاي تفرض شروطك وتعمل لي فيها داعية !!!.
 
اللي عملوه أفراد الأوركسترا تصرف راقي انهم انسحبوا ، تقدر تجاوبني فضيلتك لو في بلادك الاسلامية واحد هندوسي ولا بوذي ولا مسيحي ولا يهودي عمل العكس  ،مش في الأوبرا ..لأ في قهوة بلدي في حارة !! شوف حيحصل ايه !!؟؟  لسانه نفسه وراسه اللي فيها لسانه ورقبته اللي شايله راسه حيحصل فيهم ايه من أفراد أوركسترا الشعب المتدين بطبعه ؟؟!!! .
 
ياريت نبطل حشرية ونتعالج من وسواس هداية الآخرين ومحاولة ادخالهم الجنة بالغصب والعافية ، بص في ورقتك وحل  أسئلتك وانشغل بنفسك وخد أي دوا لعلاج فرط افراز غدة البروموهات الدينية .