قصة من واقع الحياة لكل شئ زمان ولكل امر تحت السماوات وقت

5 Min Read

 قصة من واقع الحياة لكل شئ زمان ولكل امر تحت السماوات وقت
موضوع
زى اى اتنين اتجوزوا
حلموا ربنا يديهم اطفال

وتعدى شوية ايام
وربنا يديهم بنت
و شوية وتيجى بنت كمان

ليلى وايمان

وسنين تعدى
يكبروا البنتين
ويكبر جوا كل واحدة حلمها
ويكبر جوا ابوهم وامهم
حلم الفرحة الكبيرة

ويخبط الحلم الاولانى على بابهم
وتكمل الفرحة

ويبدأ انتظار الحلم التانى

مالك يا ايمان
مافيش يا ماما
انا حاسة بيكى يا حبيبتى
ربنا هيبعت لك نصيبك

ليلى اتجوزت يا ماما
وخلفت كمان

سابتها مامتها من غير رد وقامت
وهى مش عارفة تعمل لها اى حاجة

وقفت قدام المرايا
فضلت تبص على شعرها
لونه حلو بس مش ناعم
بشرتها فاتحة بس جسمها كبير
هى رقيقة آه
بس الناس بتاخد بالمظاهر

بصت على مكتبها
دراستها فرنساوى ومتفوقة
بس بتشتغل شغلانة على ادها

مسكت صورها
وقعدت تتفرج على ذكريات
كل صاحباتها اتجوزوا
مش فاضل غيرها

وزى اى واحدة
كانت بتدخل على الفيس بوك
ومع كل بوست
لأى واحدة من صاحباتها بتتخطب
او بتحط صورة فرحها
او بتنزل بوست انها حامل
او بتعزمها على سبوع البيبى

كانت بتنزل منها دمعة غصب عنها
وتقول له يارب
لو مش كاتب لى انى حالى يتغير
خلينى استحمله

ومع كل شهر يعدى عليها
وزى كل البنات
كان بيجيلها خوف
يا ترى هتلحق تتجوز وتخلف
ولا هتتقطع منها الفرصة
والشهور كلها هتبقى شبه بعض

وتخلص العشرينات
وتلاقى نفسها فى نص التلاتينات

ومع اول شعرة بيضا
يبدأ السواد يزيد فى عينيها

تنزل شغلها
والضحكة ماتفارقش وشها

والمجاملة ماتسيبش لسانها
لأى حد بيفرح

مبروك ماجالك يا حبيبتى
عقبالك يا ايمان
تضحك وتقول
اللى ربنا عايزه يكون

تحضر فرح وتبارك
عقبال مانحضر فرحك يا ايمان
تضحك وتقول
اللى ربنا عايزه يكون
تجرى وتساعد فى فرش شقة عروسة
وفى عز ما بيشتغلوا
عقبال ما نتعبلك يا ايمان
تضحك وتقول
اللى ربنا عايزه يكون

ترجع البيت
تشوف طلبات ابوها وامها
وعلى وشها ابتسامة
تقطع قلب مامتها
وف سرها امتى اطمن عليكى

وتتسرق الايام
وفجأة تلاقى نفسها فى الاربعينات
وفضلت تراقب نفسها كل شهر
لسة فيه فرصة تخلف
لو اتجوزت ولا لأ

وفى يوم وليله
تتعرف عليه
السن جرى بيه هو كمان
بس كان قابل باللى ربنا كاتبه

اسمى رضا
وانا ايمان

وتعدى الايام
تتعلق بيه بس مش عارفة
هى بتحبه ولا لأن مافيش بديل
بس الاكيد انه هو حبها

حب رقتها وضحكتها
حب اهتمامها وبرائتها
حب الامومة اللى فيها
من غير ماتكون ام

تتجوزينى يا بسمة
بسمة مين اسمى ايمان
لأ انا هاقولك يا بسمة
ضحكت فى وشه اول ما قال لها كدة
قال لها
اهو عشان الضحكة دى
هاقولك يا بسمة

ها تتجوزينى؟
بصت فى الارض
وبنفس الضحكة قالت
اللى ربنا عايزه يكون

وفرح مليان معازيم
بس كلهم واقفين بولادهم
وبدل ما وصيفات الفرح اصحابها
وصيفات الفرح بنات اصحابها
اصل العروسة فى اوائل الاربعينات
والعريس داخل على الخمسين

وتعدى اول ايام فى حياتها
وفجأة
يتقطع عنها اللى كان بيحصل كل شهر
تنهار اعصابها

رضا الحقنى
خلاص مش هابقى ام

مش احنا متفقين ؟؟
انا مش زعلان

تعالى نروح للدكتور
وبعد الكشف

ونظرات الحزن والدموع على وشهم

ها بقى هتسموه ايه
تتحجر الدموع فى عينيها
وتبص للدكتور

مين اللى هنسميه
اللى جى
هو مين اللى جى يا دكتور
مبروك يا ايمان

انتى حامل فى شهرين

ومن غير حساب تنزل دموعها شلال
ومن وراها ضحكة
بس ضحكة بصوت عالى

وترجع بيتها هى ورضا
وسلسلة من الافكار

وتروح تقف قدام المرايا
شعر ابيض كتير
مش مهم
اللى ربنا عايزه هو اللى كان

شكلى مش حلو قوى
مش مهم
اللى ربنا عايزه هو اللى كان

وشهر ورا شهر
وبوست انا حامل
وبوست تانى دى بنت
وبوست تالت صورتها فى الشهر التاسع
وبوست رابع على سرير المستشفى
وجنبها “فرح”
بنوتة قمر

وتمشى بيها فى كل حتة
وكأنها عايزة تعلن لكل الناس
مافيش مستحيل عند ربنا

ماخلصتش حكاية ايمان لسة
تكبر فرح
وشهر ورا شهر
تسع شهور
عمر البرنسيسة فرح

ومرة كمان
يتقطع عنها اللى كان بيحصل كل شهر
بس المرة دى من غير انهيار

اصل ربنا كرمها خلاص

وزيارة للدكتور تانى
وبعد الكشف

ها عندكو اعصاب تستحملوا الصدمة
تضحك فى وشه
ماتقلقش انا عارفة
وخلاص مش عايزة اطفال
ربنا كرمنى بـ فرح ودا كفاية

طب بقول لكم ايه
هتسموهم ايه؟

هنسميهم؟؟؟؟؟؟؟؟؟

مين دول
ايمان انتى حامل فى توأم

المرة دى الضحكة
كان معاها نظرة للسما
بقت تبوس فى فرح
وتحضن رضا
وتبص للسما وتقول له

اللى انت عايزه احسن شئ يكون

لكن ربنا ماسمحش ان التوأم يكمل
لأن اللى ربنا عايزه احسن شئ يكون

لما شوفتها وهى شايلة بنتها فى الشارع
شوفت حضن ام
وشوفت بنت غاطسة فى الحضن ده

وهى ماشية قدامى
حسيت انها معجزة على الارض

ربنا غنى جدااا
وعنده خير فوق كل تصوراتنا
هو اللى خلق الطبيعة
عشان كدة هو الوحيد
اللى ممكن تطلب منه
يكسر قوانين الطبيعة عشان يديك
اتجرأ واطلب

الايمان الحقيقى
انك تبقى عارف انه قادر على كل شئ
انك تبقى واثق وعندك رجاء فى ربنا
وتصدق امور كتير حتى لو مش شايفها بعينيك

إبمان خدت فرح من بق الزمن
وانت كمان ممكن تعمل كدة

والكلام ده حقيقى جدااا .

سفر الجامعة ٣ : ١
لِكُلِّ شَيْءٍ زَمَانٌ، وَلِكُلِّ أَمْرٍ تَحْتَ السَّمَاوَاتِ وَقْتٌ:

 

Share this Article