ردت الإعلامية ريهام سعيد على تعليق طبيب التجميل الذي تتهمه بالتسبب في تشويه وجهها، موضحة أن «العملية فشلت وحدث مضاعفات وتشوهات في وجهها بسبب الطبيب المعالج».
وقالت ريهام سعيد في مقطع فيديو شاركته عبر موقع «فيسبوك»: «حقيقي أنا مستفزة جدا من الناس اللي بتكلمني بتقولي علقي.. أعلق على ايه ولا ايه، على حصل في وشي العيب اللي عملت عشانة العملية لسه موجود بس زيادة عن ده طلع كرمشة على وشي وخطوط غريبة جنب عيني».
وأضافت: «أنا عايزة بس أقول حاجة بسيطة جدا للناس، أنا حقي هاخده بالقانون من الدكتور.. أنا عيني باظت.. وعيني اللي بتلف لوحدها دي عندي بيها مستندات، شوفتوا وشي بقى عامل إزاي.. شوفتوا عمليات التجميل حلوة إزاي.. ضحكتي بقت من هنا لهنا، أنا مش عارفة إزاي أنت (الطبيب) بتتكلم ولا بترد إزاي».
واستطردت: «نزل فيديوهات زي ما أنت عايز، وأنا عشان ست محترمة لحد دلوقتي مش عايزة أرد.. أنا بتكلم بس عشان هو منزل صورة بشكلي قبل وبعد العملية ليه مش عارفة.. أنا مجبتش سيرتك إزاي بتقول هترفع قضية أنت اللي ترفع ولا أنا؟».
وكانت ريهام سعيد قالت خلال الساعات الماضية إنها لأول مرة تظهر في لايف عبر «إنستجرام» دون فلتر أو ميكاج، والسبب أنها تريد إخبار الجمهور بما حدث لها في عملية التجميل الفاشلة، مشيرة إلى أنها تعالج نتيجة هذه العملية منذ 3 أشهر.
وأضافت ريهام سعيد في بث مباشر عبر «انستجرام» موجهه رسالة لجمهورها: «هل هذا شكلي؟ هل هذا شكل ريهام سعيد؟ الدكتور بعد ما العملية باظت عمل فيلر في وشي على الحفر التي ظهرت بعد العملية الفاشلة في وشي بعد ما بوظلي شكلي، وعملي خطوط زي الشيطان، وأجرى لي خياطة تحت العين وهذه جريمة، وحاجبي زي الشيطان عشان كده عملت تاتوه ومسحت الحاجب وعدلته».
