كشفت الطالبة حبيبة محمود إبراهيم الثالثة على الثانوية العامة لهذا العام في الشعبة الأدبية، عن كواليس وتفاصيل رحلتها خلال العام الدراسي، مشيرة إلى أن دعم الأسرة أحد أهم أسباب النجاح لها.
الاستيقاظ باكرًا يوميًّا
وخلال لقاء خاص مع فيتو تحدثت “حبيبة” عن نظام يومها خلال العام الدراسي قائلة: أكتر حاجة كنت بحاول احافظ عليها طوال العام إني أصحى بدري ما أتأخرش عن 5 أو 6 صباحًا.. كنت بحس ان فيه براح في الوقت اني انجز كل اللي ورايا.
وتابعت: مفيش نظام مذاكرة أنا كنت بفتح الكتاب وخلاص.. في حاجات كنت بحفظها والسنة كانت طويلة لما بتعيد المنهج وتراجعه بيتحفظ وبيكون أسهل.
أصعب المواد خلال الدراسة والامتحانات
وأوضحت الثالثة على الثانوية العامة أن الامتحانات كانت على عكس سير العام الدراسي متابعة: الامتحانات كانت على عكس طول السنة.. كان طول السنة بقلق من مواد زي التاريخ لانه تقيل وصعب ومحتاج مجهود لكن في الامتحانات كان العكس والحمد لله امتحانه كان كويس بالنسبة لي لكن في الامتحانات الجغرافيا اللي كانت أصعب.
الدراسة بكلية الألسن
وعن الكلية التي ترغب في الالتحاق بها أردفت: ناوية على ألسن وبقالي كذا سنة نفسي أدخلها.. وبحب الترجمة أوي وعايزة أدخل قسم إسباني.. بتفرج على مسلسلات أسباني بالتأكيد.
دعم الأسرة خلال العام الدراسي
وعن دعم أسرتها قالت: كان ليهم دور كبير جدا وكان بيجي عليا وقت انه خلاص مش قادرة اكمل دعمهم لي اللي كان بيخليني قادرة اكمل.. كانوا دايما بيقولوا لي ربنا هيكرمك وربنا مش هيضيع تعبك وهيكرمك في النهاية ومكنوش بيضغطوا عليَّ خالص.
وأشارت حبيبة إلى أن الضغط من الأهل على الطالب يأتي بنتيجة عكسية، قائلة: متتوقعوش انه لما تعملوا كدا هييقى متفوق لا خالص.. وأهم حاجة في السنة دي الدعم النفسي لأنها سنة بتعتمد على النفسية اكتر من اي حاجة تانية.
دور والدتها
وعن دور والدتها أوضحت: ماما كانت معايا في كل حاجة ومعايا في الدروس مع أن الدروس كانت قريبة من البيت بس مكنتش بتحب تسيبني لوحدي.. كانت بتستحمل مني كتير أوي لأني من الضغط في الدراسة كنت بتضايق وبعيط وهي كانت بتستحمل كدا دا.
علاقتي بربنا أهم شيء
وتابعت عن التفاصيل التي كانت تعتمد عليها خلال العام الدراسي قائلة: علاقتي بربنا اهم حاجة.. انت لو بتتعب وبتعمل مجهود وعلاقتك بربنا مش أحسن حاجة مش هتلاقي نتيجة.. اصلي وأقرأ قرآن كل دا بيفرق جدًّا وهيقلل من الضغط والتوتر.
