كيلو الفراخ، تصدر سعر كيلو الفراخ تريند مصر على منصة “أكس”، بعد ارتفاع سعرها في السوق، ليبلغ نحو 110 جنيهات للكيلو، الأمر الذي دفع المصريين من نشطاء مواقع التواصل الاجتماعي للتساؤل عن الحل، مع موجة ارتفاع أسعار الفراخ واللحوم والخضروات أيضًا.
سعر كيلو الفراخ يتصدر تريند مصر
سعر كيلو الفراخ الذي ارتفع بشكل كبير خلال الأيام السابقة، دفع النشطاء لتدشين هاشتاج بعنوان “كيلو الفراخ”، مبدين تعجبهم عن الارتفاع المتسارع لكيلو الفراخ، الذي بلغ 100 جنيه، والبانيه الذي بلغ 220 جنيها، وكيلو اللحمة الذي زاد عن 400 جنيه.
عبرت داليا عمار عن اندهاشها قائلة: “سعر اللحم الأبيض (الفراخ) بـ 100 جنيه مصري.. سعر اللحوم الحمراء بـ 420 جنيها مصري.. سعر كرتونة البيض بـ 150 جنيها مصري.. كيلو الدقيق بـ 35 جنيها مصري.. سعر كيلو المكرونة بـ 35 جنيها مصريا.. كيلو الرز بـ 35 جنيها مصريا…”.
وقال إبراهيم علي: “كيلو البانيه بقي بـ 220 جنيها وكيلو الفراخ بـ 110 جنيهات”.
ارتفاع سعر العلف وزيادة سعر كيلو الفراخ
وعلق عصمت سليم قائلًا: “ارتفاع اسعار كيلو الفراخ وكيلو اللحمة بسبب ارتفاع أسعار الأعلاف.. الاكتفاء الذاتي من الأعلاف سهل بزراعة مساحات شاسعة من الأراضي المستصلحة بمحصول الشعير والذي لا يستهلك الكثير من المياه ويتناسب مع مناخنا”.
أما رامي نصر فقال: “ارتفاع أسعار علف الدواجن ارتفاع أسعار العلف 10 آلاف جنيه في الطن خلال أسبوع، حتى لو بعنا كيلو الفراخ بـ80 جنيه برضوا خسرانة هنشتغل ايه؟”.
نقص البروتين عند الأطفال يهدد بانتشار الأمراض
وعبرت نشوى الشربيني عن اندهاشها فقالت: “متخيلين أن فيه أطفال مبقتش بتاكل أى نوع من البروتين الحيوانى. طب متوقعين كمية الأمراض اللي هتعاني منها؟ كيلو هياكل الفراخ وصل 100 جنيه الأسعار بتزيد كل ساعة مش كل يوم رغيف العيش البلدى بجنيه ونص ده حتى أسرة من 5 افراد مبقاش ينفع تاكل عيش حاف”.
النشطاء يتساءلون عن حل لارتفاع الأسعار
وقال محمد رجب: “البانيه بقي بـ 220 جنيها.. نعمل ايه؟”
وعلق عمرو محمد قائلًا: “كيلو الفراخ وصل 100جنيه.. كيلو اللحمة كسرت 400 جنيه.. كيلو الأرز اقل سعر فيه 35 جنيها.. السكر مش موجود من الأساس.. الخضار كله غالي أوفر.. الحل ايه؟”.
وتساءلت منى بحر “يا جماعه بجد كيلو اللحمه بـ 400 جنيه، وكيلو الفراخ بـ 100، الناس الأرزقيه واللي معاشهم بسيط يعيشو إزاي… حسبي الله ونعم الوكيل”.
أما الخواجة عبد الصادق فقال: “كيلو الفراخ كان 75 وبعده بيوم 82 زيادة 7 جنيهات، والنهاردة 110 جنيه في أقل من يوم، والجزارين مش عاوزين يبيعوا اللحمة إلا بـ400.. يارب انت عالم بالحال فكها على كل الناس”.
وعلق ربيع الإمبابي قائلًا: “كيلو الفراخ زاد 15 جنيها في 11 يوم وزاد 6 جنيهات في يوم واحد، رمضان لو دخل علينا بالوضع ده مش عارف ايه اللي يحصل بصراحه”.
تكلفة اكل يوم واحد 500 جنيه
وردت حنان البحيري قائلة: “كيلو الفراخ عند الفرارجي بـ 102 البانيه بـ 205”
وقال صالح رمضان: “كيلو الفراخ بـ 100 جنيه! ولسة زمان لما كان رب الأسرة الأسعار تكون غالية علية يقولك أروح أجيب فرخة بـ 30 جنيها أعملها أكل العيال، دلوقتى علشان تشتري فرخة مش أقل من 300 جنيه؟ ورغيف العيش بـ 2 جنيه وبصل وخضار وطماطم مش أقل من 100 جنيه يعنى تكلفة اكل يوم واحد 500 جنيه؟”.
ثلاجات فارغة إلا من الأدوية
أما محمد بن علي الطالبي فرد قائلًا: “كيلو الفراخ وكيلو اللحمة وكيلو السمك… تفتح ثلاجات الناس الغلابة متلاقيش فيها غير شوية علاج وناس تانية مش قادرة تجيب علاج أصلا.. الشعب بيكمل باقي يومه نوم الأب والأم بيصبروا ولادهم على شوية دقيق بسكر على نار”.
وقال محمد عبد الرحمن: “شيكارة العلف 25 كيلو كانت بـ 250 السنة اللي فاتت من أسبوع كانت بـ 650 النهاردة بـ 900 كيلو الفراخ كان من أسبوع 72 النهارده بـ 100”
