استنكر شريف رسمي المحامي والناشط الحقوقي، مقتل الممرض الشاب مينا موسى وتقطيع جثته بعد خطفه وطلب 150 الف جنيه فدية .
وكتب رسمي عبر حسابه على فيسبوك :” من فترة بمر بشوية غلاسة من جهة ما و ماليش نفس اكتب حاجة ولا متابع حاجة لكن اليوم قريت ان المباحث كشفت جريمة قتل رهيبة اجبرتني علي الكتابة لتحذير اولادنا و بناتنا و لفت نظرهم هما و اهاليهم.
مينا موسى شاب مصري من قرية الروضة محافظة المنيا اتخرج من معهد التمريض السنة دي .. شاب الكل بيشهد بأخلاقه و حسن سلوكه .. وحيد ابوه و امه علي 3 بنات معروف انه بيحب يساعد الناس
ليه زميل خريج نفس معهد التمريض ارشده علي اعلان علي السوشيال ميديا ان فرصة عمل كويسة قوي بمرتب كبير في القاهرة و لان الولد طموح و حابب يزود دخله راح مينا اتصل بللي عاملين الاعلان و اخد العنوان و نزل علي
القاهرة السبت اللي فات و لما وصل للمكان اتفاجئ ب3 اشخاص منهم زميله اللي ارشده علي الاعلان و هجموا عليه و ضربوه بهدلوه و كتفوه و اتصلوا بأهله و طلبوا فدية 150 الف جنيه و سمعوا اهله صوت ابنهم و اتفقوا علي
مكالمة لتأكيد تجهيز الفدية و فعلا جهزوا الفدية لكن المجرمين متصلوش تاني و بعد انتظار اضطر الاهل يبلغوا البوليس و عرفوهم الرقم اللي اتصل و بتتبع الرقم وصلوا اليوم لشقة في منطقة الزاوية الحمرا و
باقتحامها وجدوا ايدين و رجلين لجثة شاب و اتقبض عليهم و اعترفوا انها جثة مينا و انهم قتلوه لما حاول يقاوم و بعدها المجرمين قطعوا الجثة و رموا الراس في ترعة الإسماعيلية و بعض الاشلاء في مقلب زبالة نهشتها الكلاب الضالة .
مش متخيل كم الغدر و الخسة لزميل الدراسة اللي استدرجه ولا الإجرام و الشر اللي وصله بعض الشباب المصري !! ، الغريب في الموضوع ان الجريمة دي فيها شبهة اتجار بالاعضاء و ده اللي هتكشفه التحقيقات في الايام الجاية سوي بالنفي او التأكيد.
واختتم :” اللي عايز احذر منه اولادنا اياكم و الجري ورا اعلانات السوشيال ميديا خاصة اللي بمرتبات كبيرة و خبرات قليلة .. كتير منها نصب .. استدراج فتيات لممارسة الدعارة و خاصة اعلانات المساج و التدليك و التمثيل و الغناء و السكرتيرات الخاصة .. استدراج شباب و سرقتهم بالاكراه او خطفهم و طلب فدية و بيوصل الموضوع للقتل زي ما حصل لمينا موسي ربنا ينيح روحه و يصبر أهله اللي هيتجننوا
رجاء محبة ابوس ايديكم و رجليكم احترسوا و احذروا من اعلانات السوشيال ميديا و شياطينها .. معدل الجريمة مع خرافي و انواع الحرايم بقت غريبة و عجيبة و بشعة .. علي الاهالي متابعة اولادهم و بناتهم و حد كبير يروح معاهم المقابلات اللي من النوع ده و يا ريت الشباب يعرفوا اهاليهم خط سيرهم و رايحين يعملوا المقابلة فين
يا رب ارحم يا رب ارحمنا
#حق_مينا_لازم_يرجع
