استغاث عدد من طلاب الثانوية العامة، الذين أجروا امتحاناتهم في مجمع شها بالدقهلية، بعد إلغاء امتحان الكيمياء لعدد كبير منهم دون الآخر، وذلك بعد انتشار فيديو تلقين معلمة شقيقتها الإجابات من أسفل مبنى المدرسة، في أثناء امتحان الكيمياء.
استغاثات طلاب ثانوية شها بالدقهلية بعد قرار إلغاء امتحان الكيمياء
تواصل القاهرة 24 مع عدد من الطلاب الذين حصلوا على نتيجة ملغي الدور الثاني في امتحان الكيمياء، والذين عبروا عن مدىى حزنهم بعد حصولهم على هذه النتيجة.
وقالت الطالبة خلود: أنا جالي نتيجة الكيمياء ملغي دور تاني، أنا مكنتش حتى في لجنة البنت اللي غشت، والصوت مكنش واصلنا أصلًا، ومراقب الدور بيقفل الشبابيك احنا كنا في الدور الثاني.
وأضافت: ليه ما أخدوش تصرف للمراقبين اللي بيراقبوا زينا، وليه مخدوش تصرف ضد رؤساء الأدوار والأمن اللي تحت.
واستكملت خلود: أنا واحدة مش هدخل دور تاني لو عملو ايه، وهاخد درجتي اللي اتعملت، دا ظلم إحنا مسمعناش حاجة من برة، والشبابيك كانت مقفولة، وليه أشيل مسؤولية فيديو اتعمل وانتشر من غير أي حاجة، وواضح في الفيديو إن الصوت مش عالي للدرجة إنه يسمع اللي جوا اللجان.
طالبة: المراقبين كانوا بيقفلوا الشبابيك أول ما يسمعوا أي صوت
بينما قالت طالبة أخرى تدعى منة: أنا مش في نفس اللجنة اللي صاحبة الفيديو كانت بتغش فيها، ولا حتى في نفس المبني حتى الصوت أكيد مكنش واصل، والمراقبين كانوا بيقفلوا الشبابيك أول ما يسمعوا أي صوت أصلا.
وواصلت الطالبة منة: إزاي أنا امتحاني يبقى ملغي واللي ورايا وقدامي معدين فيها، يعني أنا بسمع وهما لأ، في كل لجنة شوية ناجحين وشوية هيعيدوا، عايزة أعرف اشمعنا إحنا.
وأردفت: والله ما فيه حد من اللي جاله ملغي سمع حاجة، حرام لما يضيعوا علينا حلمنا، وكسرتنا إحنا وأهلنا على حاجة إحنا معملنهاش وملناش ذنب فيها.
ومن مبنى آخر من مجمع شها، حيث يتكون المجمع من 3 مبانٍ، فتانالطالبة ياسمين: إحنا في المجمع 3 مبان، المبنى بتاع اللجنة بتاعتنا مش هو المبنى اللي حصل فيه غش، ورغم كده جالنا إعادة للامتحان.
واستطردت: كانوا على الأقل خلونا نمتحن بعد الأحياء مش يخلونا دور تاني، ليه نمتحن دور تاني، إحنا تعبانين نفسيًا..اتصدمنا صدمة عمرنا لما عرفنا إننا هنعيد الامتحان دور تاني، وإحنا نسينا المنهج أصلا.
ومن المبنى الثالث، قال الطالب زياد: أنا مستقبلي بيضيع قدامي ومش عارف أعمل حاجة، طلبة سلمون كلها كانت في مجمع شها، معظمنا جاله إعادة امتحان الكيمياء.
واختتم: المجمع فيه مباني كتير وأنا كنت في المبنى اللي على الشارع بعيد عن مبنى الغش، مفيش غير 5 أو 6 بس اللي نجحوا عندنا وباقي اللجنة ملغي.
