استنكرت الكاتبة ماجدة سيدهم، تجاهل مؤسسات والعديد من الاعلاميين، فوز الفيلم المصري “رفعت عيني للسما” إخراج أيمن الأمير وندى رياض، على جائزة العين الذهبية لأفضل فيلم وثائقي في مهرجان كان السينمائي في دورته 77، وذلك لاول مرة في التاريخ .
وكتبت سيدهم عبر حسابها على فيسبوك :” البرشا اللي علمت على هوليود الشرق لا حد حس بيهم ولا وهم بيحضروا للفيلم ولا وهم رايحين للمهرجان ولا وهم راجعين قريتهم ..ولا حد دعمهم ولا أي مؤسسة المفروض الأمر يخصها طلعت قالت حتى مبروك ..ولا طل علينا أي من المشاهير المتعاليين من بتوع الفن رسالة ومشواري الفني واحنا بتوع الجوائز الكبيرة طلع ونطق بحرف .
وتابعت :” ماهو بصراحة خبطتين في الراس توجع ..أول خبطة بفوز فيلم “ريش ” لدميانة نصار كأحسن ممثلة في مهرجان كان العالمي واللي طلع نار الغيرة والضيق من قلب بعض المشاهير واللي للأسف عاملوها بتجاهل واضح ..ولا نسيتوا..؟! ورغم كدا هاتفضل دميانة نصار هي برضة أفضل ممثلة.
وواصلت :” وبعدين ياخدوا الخبطة التانية ومن نفس القرية ويفوز عالميا الفيلم التسجيلي” رفعت عيني للسماء” لفنانات البرشا الحقيقيات.
ورأت :” دا يدل على حاجة واحدة أنه ماعندناش قلم حر يناقش قضايانا بصدق ( الأقلام تجارية ) ولا عندنا فن ولا فنانين حقيقين…فمن بعد سعاد حسني جبرت على كدا ( فيما ندر ) اللي عندنا شوية مشاهير نرجسيين وراهم حشد إعلامي ورجال أعمال ومصالح ونفوذ وعلاقات واسعة على شوية مهرجانات وبس .
واختتمت :”البرشا لتاني مرة تؤكد أنه من قلب المعاناة الحقيقية بيكون الإبداع والتفرد والعالمية ..غير كدا كله مجرد شو عمره قصير.
