قاتل الجواهرجي حسني الخناجري .. اعترف المتهم بقتل الجواهرجي حسني الخناجري في درب ناصر في بولاق أبو العلا، بارتكابه الجريمة لتنفيذ عملية سرقة الذهب.
استمعت النيابة لاقوال عامل محل مصوغات حسني الخناجري جواهرجي بولاق المجني عليه، كشاهد في القضية، ونشر موقع صدى البلد نص التحقيقات .
وقال مايكل ممدوح عامل محل جواهرجي بولاق في التحقيقات :” المتهم قال لعم حسني أنا فكيت وديعتين وكل واحدة فيهم بمبلغ 350 ألف جنيه وعم حسني طلعله سبائك ذهب 4 خمسة جرام و2 عشرة جرام وسبع جنيهات 8 جرام للجنيه، والراجل طلب من عم حسني قهوة عملها وعمل تليفون كأنه يكلم حد يجيب منه فلوس وبعدها شرب شاي وكان عمال يشرب سجاير كتير وبعدها قالي روح هاتلي سجاير.
الراجل في أول كلامه قال أنا عاوز حاجات بمبلغ 350 ألف جنيه وكان كل شوية يزود الأسعار وأنا حسيت أنه بيماطل على الفاضي وحسيت أنه عاوز يخرجني بره المحل وأنا فاكر كويس أن لما قالي تعالى نبص على الشغل في الفاترينة أن مش غرضه الشراء، وبصيت لعم حسني وأنا طالع وشاورت له بوشي يمين وشمال كأني بقوله لا بس هو مخدش باله.
لما طلعنا المتهم شاورلي على 3 حلقان ودبلة وخاتم، ولما دخلنا المحل جبتهم، وعم حسني قاله دول هيبقوا تقال على بناتك الصغيرين وعم حسني طلع له حلقين صغيرين من الخزنة، والراجل قالوا قفلي الحاجات بـ500 أو 600 ألف جنيه وساعتها قاله موضوع الودائع ده وأنا استغربت لأن مفيش حد بيعمل كده.
أنا لما دخلت المحل لقيت عم حسني على الأرض وغرقان في دمه على يميني من ناحية الفاترينة اللي قاعد عليها والفاترينات كانت مكسورة ومكنش قادر ياخد نفسه وعمال ينهج وساعتها ماجيتش جنبه عشان خوفت وتوفى قبل الإسعاف ما توصل، وتقريبا المسروقات وصلت لـ مليون و20 ألف جنيه بس أنا مقدرش أحدد بالضبط هي قد ايه.
