كشف الإعلامي أحمد شوبير حارس مرمى الأهلي ومنتخب مصر السابق عن تطورات جديدة في أزمة حسين الشحات جناح الفريق الكروي الأول بالنادي الأهلي مع محمد الشيبي لاعب فريق بيراميدز وكل ملابسات الأزمة المشتعلة بين الطرفين حاليًا.
وقال شوبير: «بصراحة كده مفيش استلطاف بين الأهلي ولجنة الانضباط وليه مفيش استلطاف لإن النادي الأهلي كان قدم طعن في شرعية هذه اللجنة ثم تنازل عن هذا الطعن بعد ذلك، ومنذ ذلك الوقت حدث غضب من السادة المستشارين الأجلاء ضد النادي الأهلي».
: تعليق مثير من عصام الشوالي على مباراة الزمالك أمام نهضة بركان
وتابع شوبير: «طيب لجنة الانضباط والسادة المستشارون حكموا في القضية ..! لأ لسه، لإن سيادة المستشار شيرين فهمي ولجنته مستشارين كبار بيحكموا في قضايا عظيمة وكبيرة جدا والحاجات دي بالنسبة لهم صغيرة بس هي بوضوح جدا مش ملعبهم وعشان كده أنا قولت لازم يكون في اللجنة ناس بتوع كورة زي المستشار الراحل عادل الشوربجي».
وأوضح أحمد شوبير: «طيب أيه اللي هيحصل خلال الفترة اللي جايه، بصوا ما كان ينبغي أن يخرج تصريح من لجنة الانضباط إن جالنا رد من الفيفا إن ده شأن داخلي، وبالتالي حضرتك أصبحت حر، إنت الشكوى اللي عندك من الأهلي إن
الشيبي خالف اللوائح ورفع قضية في المحاكم المدنية وعليه فلجنة الانضباط هتقول لك يا أهلي أنت مالكش حاجة عندي مالكش رد عندي أنا معنديش حاجة ضد الشيبي وأنا جالي رد من الفيفا بيقول ده شأن داخلي، فيالا بالسلامة يا أهلي».
وأضاف شوبير: «المستشار شيرين فهمي قال إنه لسه بيدرس طيب ما حضرتك اللي طلعت صرحت وقولت الفيفا قال شأن داخلي، مفيش حل بقه غير قضية تانية تترفع في المحاكم ودخلنا في شغلانة جديدة ومش هنخلص».
واختتم شوبير: «بس الحقيقة اتحاد الكرة اللي أدان نفسه لما طلّع جواب بتاريخ 4 يناير 2024 وقال فيه إن محمد الشيبي خالف النظام الأساسي فالأهلي قال لك طب ليه حضرتك ما طبقتش النظام طالما اللاعب خالف النظام الأساسي بس لجنة الانضباط بتقول لك لم يخالف النظام الأساسي طيب فين الحل».
