اول ما بنقول قبطي او اقباط دماغك بتروح على طول على المسيحين لكن الحقيقه الاصل في كلمة قبطي معناها مصري …
القبط هم اهل مصر سواء مسلمين او مسيحين ملهاش اي علاقه بالديانات..
وانتشرت كلمة قبطي على اهل مصر الاصليين اثناء الحكم البيزنطي وفضل الموضوع كده اقباط يعني مصريين بمختلف طبقاتهم وديانتهم حتى الحكم الفاطمي ومن بعدهم الايوبيين والمماليك اللي جعلو كلمة قبطي مقتصره على اتباع الكنيسه الارثوذكسيه سواء بقى كانو مصريين او غير مصريين ومنعو تسمية مسلمي مصر بالاقباط ومنعرفش ايه السبب
وبالنسبه للغه القبطيه فهي لغه مصريه اصيله لانها التطور الرابع من اللغه المصريه القديمه بعد الخط الهيروغليفي والهيراطيقي والديموطيقي …
لغايه كده الموضوع إتفهم…
نيجى بقه على موضوع بورتريهات الفيوم..
هناك مفهوم خاطئ من يربط بين بورتريهات “وجوه الفيوم” والديانة المسيحية، لكنه فن قديم عرف قبل مجىء المسيحية إلى مصر، وربما اندثر فى الحقب المسيحية الأولى فى البلاد، حيث يعود تاريخ رسم وجوه الفيوم إلى القرن الأول للميلاد خلال فترة السيطرة الرومانية على مصر وامتدت حتى القرن الثالث والرابع للميلاد مع انصراف الناس عن التحنيط بعد دخول المسيحية إلى مصر.
يذكر أن المسيحية بدأت فى الانتشار فى جميع أنحاء البلاد فى القرن الثانى الميلادى، وهو ذلك الوقت التى بدأت فيها الإقلاع عن التحنيط كون المسيحية لم تكن تؤيد التحنيط، وذلك استنادا للنص الإنجيلى “فمن التراب نحن وإلى التراب نعود عند الموت”، وهو ما يفسر أن وجوه الفيوم ليست مرتبطة بالديانة المسيحية على ما هى مرتبطة أكثر بالتحنيط والفن المصرى القديم.
ويرى الروائي الفرنسي أندريه مالرو أن نظرة هذه الوجوه تتطلع للأبدية فالموتى عن طريق هذه اللوحات يظلون على قيد الحياة بالرغم من موتهم فيبدو الميت حياً خالداً وهذا هو الهدف الذى صُورت من أجله هذه الوجوه فى نظر أصحابها.
طيب ايه علاقة اللاعب محمد صلاح بالموضوع
نفس المشكله والمعتقد بأن كل ما هو قبطي يخص المسيحين فقط وده غلط طبعا لان زي ما اتفقنا قبطي يعني مصري
الصورة المرفقة مع المقال.. بورتريه لمحمد صلاح رسمه فنان مصرى اسمه Ahmed Sabrouti اللي رسم بورتريهات للاعيبة المنتخب على طريقة بورتوريهات الفيوم وده زى ما قولنا فن مصري قديم…
احمد نزل الصور وبدل ما يلاقي تشجيع على موهبته ومجهوده لقى العكس تماما، هجوم مش منطقي ومبررهم انه كده بيحيي فن قبطي مسيحي لكن الحقيقه انه فن مصري قديم مالوش علاقه بالمسيحين، مستوحى من بورتريهات الفيوم ودي كانت صور بتترسم للاشخاص المتوفيين وبتتلزق على مومياواتهم وده دليل على انه مالوش علاقه بالمسيحيه لان المسيحيه كانت ضد فكرة التحنيط من الاساس…
اختم مقالى بالمثل المعروف … “اللى ما يعرفش .. يقول عدس”
