حرص الرئيس عبد الفتاح السيسي رئيس الجمهورية، على توجيه الشكر للشعب المصري بقوله: عاوز أسجل احترامي للمصريين والله وتقديري ليهم، وكلامي للمواطن الغلبان والبسيط قبل أي حد تاني في الظروف اللي إحنا عايشين فيها دي.
وتابع السيسي: أنا بلف كتير بالعربية وأقابل ناس كتير، محدش جه قالي من الناس البساط دول غير ربنا يعينك وربنا معاك، ومصر مش أمانة في رقبتي أنا بس ولا رقبة الحكومة، في رقبتنا كلنا، وكل حاجة تهون إلا بلدنا.
وقال الرئيس عبد الفتاح السيسي، رئيس الجمهورية، إنه يقدر حجم التحدي الذي يعيشه المصريون في ظل تلك الأزمات متابعًا: إذا مكانتشي الدولة المصرية بكل ما فيها يعملوا على إن مواردنا من التجارة تساوي أكتر أو تساوي إنفاقنا من الدولار، هيكون دايمًا عندنا مشكلة وهي دي كل الحكاية.
وتابع الرئيس السيسي خلال كمته في احتفالية عيد الشرطة: حد ممكن يقول الحكومة والدولة تظبط الموقف في الأسواق، طبعًا ليكم حق، لكن عاوز أقولكم اللي بتكلم عليهم دول مواطنين مصريين، لما أكون مصري، وعندي قدرة على الكسب، واتصور إن المكسب المناسب يكون كفاية.
وتابع السيسي: ده كلام مش بالخواطر تمشي الدول، الدول تمشي بالسياسات والقوانين والعمل، والأزمة اللي إحنا فيها ليها حلول أكيد، بس كلها بتعتمد علينا كلنا، إحنا بنجيب عربيات بأربعة ونص مليار دولار في السنة، 2 مليار دولار موبايل في السنة، وإحنا بقينا 106 مليون وكل حاجة متوفرة.
قال الرئيس عبد الفتاح السيسي، رئيس الجمهورية: أنا بتكلم معاكم بقلبي، من كام يوم قلت إن استقرار الدولة أمر لا تتحمله الحكومة ولا القيادة فقط، بل كل الشعب المصري، مسئول عن أمنها ومستقبلها واستقرارها وتقدمها.
وأضاف: أنا بقول الكلام ده في وقت صعب، وزي ما أنتم شايفين المنطقة بالكامل والعالم في وقت صعب جدًا ومضطرب قوي، والأوضاع في المنطقة وقطاع غزة وبعد 4 شهور من الحرب على القطاع، يا ترى الأربع شهور عدوا بسهولة في مصر؟.
